Belensky J. SAINT JUSTE, pi koni sou nom atis li ki se BSJ PROD, se yon beatmekè ak pwodiktè mizikal renome. Orijinè Pòtoprens, Belensky te grandi nan yon anviwonman mizikal, enfliyanse pa yon fanmi meloman. Byen bonè, li te arive devlope yon pasyon pou rit ak melodi, sa ki te kondwi li tou natirèlman vè mond pwodiksyon mizikal la.

Komansman ak Karyè

Belensky kòmanse karyè mizikal li nan laj 20 tan, nan eksplore diferan lojisyèl pwodiksyon mizikal. Kòm yon otodidak, li te rive fòme tèt li gras ak titoryèl an liy ak eksperyans pratik, ki ta pral pèmèt li afine pwogresivman stil inik li an ki rive melanje avèk anpil abilite : Ipòp, Elektwo ak diferan Sonorite Lokal. Premye konpozisyon mizikal li yo, byen rapid, te atire atansyon anpil nan atis lokal yo, epi se konsa li te rive fè yon nom nan milye mizik underground lan.

Nan lane 2018, li lanse tèt li seryezman sou mache mizikal ayisyen an. Gras ak travay enpekab, konstans ak kreyativite san mank li, li te rive kolabore ak anpil atis ki te deja genyen anpil popilarite nan mizik ayisyen an tankou : Wendyyy, TroubleBoy Hitmaker, Wesli ak anpil lòt ankò.

Rekonesans ak Enfliyans

Belensky J. SAINT JUSTE rive enpoze'l kòm yon figi enkontounab nan pwodiksyon mizikal la an Ayiti. Beat li yo, ki gen yon touch inik, kontribiye pou fasone son nan plizyè siksè radyonfonik. Nan lane 2023, li resevwa pri Premye Loreya nan konkou nasyonal kreyasyon beat, ki te òganize pa Delegasyon Inyon Ewopeyen an Ayiti a; yon rekonesans talan li ak enfliyans li nan milye mizikal ayisyen an.

Fòmasyon ak Transmisyon

Pasyone pa transmisyon ak pataj konesans, Belensky deside nan lane 2023 lanse yon seri de fòmasyon dirije pou aspiran beatmekè ak pwodiktè. Nan ansanm atelye li yo, ki òganize sou labèl BSJ PROD Academy, li ansenye non sèlman teknik pou pwodiksyon mizikal, men tou atizay pou kreye bèl beat san parèy ansanm ak konpozisyon inovan.

Fòmasyon sila yo, ki disponib an liy ak an prezansyèl, kouvri yon gam sijè ki soti depi nan inisyasyon nan lojisyèl pwodiksyon, pase nan enjenyeri sonò avanse, rive nan jesyon karyè mizikal. Yo apresye Belensky anpil pou apwòch pedagojik aksesib li a epi pou konsèy pèsonalize li yo, ki ede anpil moun ki fenk ap debite nan domèn pwodiksyon mizikal, lanse pwòp karyè pa yo nan endistri mizikal la.

Vizyon ak Pwojè Fiti

Toujou nan sousi pou chache nouvo enspirasyon ak nouvo defi, Belensky J. SAINT JUSTE kontinye pwodwi mizik an menm tan li ap travay sou devlopman akademi li an. Aktyèlman, li ap travay sou yon pwojè konpilasyon ki mete an vedèt talan ki dekouvri gras ak fòmasypn li yo; e li prevwa tou mete sou pye yon stidyo pwodiksyon mizikal iltramodèn.

Belensky aspire pou kontinye pouse limit pwodiksyon mizikal la epi enspire jenerasyon beatmekè ki ap genyen pou vini yo. Filosofi pa li repoze sou pataj, inovasyon ak pasyon pou mizik.